Audi កាត់បន្ថយទិសដៅលក់របស់ខ្លួននៅប្រទេសចិន
ក្រុមហ៊ុន Audi AG បានបោះបង់ចោលទិសដៅលក់រថយន្ត ៦សែនគ្រឿងនៅឆ្នាំនេះ នៅក្នុងប្រទេសចិន ដែលជាទីផ្សារដ៏ធំបំផុតរបស់ខ្លួន ដោយសារតែភាពចលាចលផ្សារហ៊ុនរបស់ប្រទេសនេះបានបំផ្លាញតម្រូវការសម្រាប់រថយន្តប្រណិត។ នេះបើយោងតាមប្រភពពីរដែលបានដឹងពីផែនការរបស់ក្រុមហ៊ុននេះ។
ក្រុមហ៊ុនផលិតរថយន្តរបស់អាល្លឺម៉ង់មួយនេះ នឹងផ្ដល់បច្ចុប្បន្នភាពស្ដីពីស្ថានភាពទីផ្សារនេះ នៅពេលខ្លួនប្រកាសពីលទ្ធផលឆមាសទី ១ នៅថ្ងៃទី ៣០ ខែកក្កដា។ នេះបើយោងតាមប្រភពពីរដែលបានស្នើសុំមិនប្រាប់ឈ្មោះដោយសារតែព័ត៌មាននេះមិនមែនជាព័ត៌មានសាធារណៈ។
ក្រុមហ៊ុនធំរបស់ Audi គឺក្រុមហ៊ុន Volkswagen AG ដែលមានមូលដ្ឋាននៅទីក្រុង Ingolstadt ប្រទេសអាល្លឺម៉ង់បានឲ្យដឹងនៅក្នុងសេចក្ដីប្រកាសមួយតាមអ៊ីមែលថា៖ «យើងកំពុងត្រួតពិនិត្យទីផ្សារនេះយ៉ាងជិតស្និទ្ធ ហើយព្យាករណ៍ពីកំណើនសេដ្ឋកិច្ចបន្ថែមទៀតនៅក្នុងរយៈពេលមធ្យមនិងរយៈពេលវែង»។
Audi បានឲ្យដឹងក្នុងអំឡុងពេលតាំងពិព័ណ៌រថយន្តនៅទីក្រុង ស៊ាងហៃ កាលពីខែមេសា ថា ការលក់ប្រចាំឆ្នាំរបស់ខ្លួននៅក្នុងប្រទេសចិនរួមទាំង ហុងកុង ដែលបានកើនឡើងដល់ ៥៧៨ ៩៣២ គ្រឿងកាលពីឆ្នាំមុន ត្រូវបានរំពឹងថា នឹងសម្រេចបានដល់ ៦០០ ០០០ គ្រឿងជាលើកដំបូងនៅឆ្នាំ ២០១៥។ ប៉ុន្តែ ចាប់តាំងពីពេលនោះ ទីផ្សាររថយន្តរបស់ចិនចាប់ផ្តើមចុះខ្សោយ ដោយសារតែកំណើនសេដ្ឋកិច្ចបានធ្លាក់ចុះ ហើយផ្សារហ៊ុនស្ថិតក្នុងសភាពចលាចល បានបង្កការបារម្ភដល់អតិថិជន។
ក្រុមហ៊ុន Jaguar Land Rover បានកាត់បន្ថយតម្លៃនិងទិសដៅលក់របស់ខ្លួនកាលពីថ្ងៃអង្គារផងដែរ។
Audi គឺជាក្រុមហ៊ុនផលិតរថយន្តប្រណិតកលក់ដាច់បំផុតរបស់ប្រទេសចិន និងជាក្រុមហ៊ុនលំដាប់លេខ ២របស់ពិភពលោកបន្ទាប់ពីក្រុមហ៊ុន BMW AG។ វាគឺជាក្រុមហ៊ុនរកបានប្រាក់ចំណេញច្រើនជាងគេផងដែរនៅក្នុងក្រុមហ៊ុនមេ Volkswagen ៕ Bloomberg/PB
